Related Stories
ALANG SA LALAKE
Ang lalake nga matawo atol sa pagsilang ning bituona, kusganon dili tikasan ug walay gikalisangan ug magbuhat gayud sa iyang buhaton bisan kanang buhata makahatag kaniya ug daghang kadaut. Manggibuhaton ug makugihon nianang kakugi nga malisud tupngan ug makapatingala sa mga tawo tungod sa kadaghan mga buhat nga mahuman.
Tungod sa iyang pagkamahigugmaon sa buhat nga maligdong gikasilagan niya kadtong mga tawo nga guwatsinanggo ug malimbongon sa ilang isigkatawo. Mosalig sa katarungan sa iyang isig ka-ingon apan kon kanang pagsaliga budhian, ma lisud na kaayo nga mobalik pa ang iyang pagtuo.
Daginutan ug tungod niini dili gayud hikabsan ug salapi sa bulsa ug tungod sa kalain sa iyang pagtuo ug paagi sa buhat, malisud nga patuhuon sa kasayon sa iyang gihunahuna nga buhaton. Kon maminyo mouswag ang iyang panginabuhi hangtud nga makab-ut niya ang hataas nga dapit sa katilingban. Manganak ug duha kon 3 pulos mga bulahan ug matambok nga bata.
Makaagi ug dakung sakit sa magpanuigon siya ug upat ka tuig usbon pagtakboy sa balatian sa magpanuigon ug 22 ug sa ikatulo sa magkagulangon siya ug 31 ug kon makaluwas siya ning mga sakita maabut niya ang kagulangon nga 56 ka tingpangani ug sa katapusan mahigugmaon nga bana ug maluluy-ong ginikanan.
••LALAKE••
Ang batang lalake nga matawo mahiatol sa pagsidlak sa Bitoon Sagittarius. Kining bataa, ulosahon ang pagtuo sa katarungan sa iyang mga hunahuna ug buhat. Ambungan ug kusgan. Siya kahadlukan sa iyang isigkatawo. Hilabihan kadaling makahuman sa iyang mga buluhaton. Kon magdaro siya, siya ang mahauna paghuman. Kon mag atop sa balay, siya gihapon ang mahauna paghuman. Sa usa ka pulong, siya abtik uyamot nga manglihok lihok.
Mahal niya ang pulong. Kon musaad, tumanon gayud ang iyang saad. Apan kon usa ka tawo motuyo pagpakyas sa usa ka saad kaniya. Kanang tawhana dili na niya tuhoan pa bisan kanus-a. Iyang higala kadtong mga maligdong ug manggibuhaton. Maayong mupaagi sa paggasto sa iyang salapi. Usa ka butang walay hinungdan dili niya paliton bisan unsa pa ka barato. Apan kon hunahuna niya nga mapuslanon ang usa ka butang. Kini iyang bayran bisan sa bili nga mahal.
Maampingon sa kadungganan sa kababayen-an, upod tahuron ug mahalon sa mga babaye. Mouswag pagsamot kon maminyo. Manganak siyag mga duha or tulo. Abuton siya sa nagkalainlaing sakit sa panuigon 3, 4 ug 22. Muabot siya sa kagulangon nga 56 ug tabangan siya sa Ginoo.
ALANG SA BABAYE
Ang babaye nga matawo atol sa pagsilang ning bituona, manggiulawon, ulo-ulohan, mabalhinon ug hunahuna ingon man kabus ug kapalaran.. Maangkon niya ang mga dakong dimalas sa kinabuhi ug bisan magmabungahon ang iyang patigayon sa sinugdan, apan sanglit sugo sa palad nga maiya ang dautan nga sangputanan ang iyang baligya hotdon ug pangutang sa walay bayad bayad hangtud nga ang tanan nga ana-a kaniya maut-ut.
Gipahamtang kaniya nga masakit unya ug daku sa may 3 ka tuig ang kagulangon, sunod sa magkagulangon siyag 20 ka tuig ikatulo sa may 31, apan kon maluwas siya ning balatian maabut niya ang kalim-an ug unom (56) ka tuig; sa katapusan maayong inahan ug asawa.
••BABAYE••
Ang batang babaye nga mahimugso atol sa pagsidlak sa Bitoon Sagittarius. Kinahanglan gasahan sa ginikanan ug usa ka bug-os nga debosyon. Nahibadlis sa iyang palad nga han-ukan siya sa daghang dimalas. Kon maninda, mahurot ang puhunan gumikan sa utang sa mga tawo nga kusog mu saulo-ulo kaniya. Ang iyang pagka manggiulawon ug pagkaabalhinon sa hunahuna ang moyudyod kaniya sa kadaut. Ang tawo sayunan lang madaug daug kaniya. Mosugot-sugoton siya sa lake, siya malagmit kasab-an sa iyang hinigugma.
Kon dunggon sa Ginoo ang pag-ampo sa iyang ginikanan. Siya mahimong solundon na babaye. Pagayukban siya sa kaulitawhan. Mahiluna sa usa ka kaminyuon nga malipayon ug malinawon. Mouswag usab siya sa iyang pagpatigayon. Makatigum siyag dakung salapi. Malumong asawa ug kugihan na inahan sa iyang mga anak.
Duawon siya sa mapintas nga sakit sa panuigon na 3, 20 ug 31. Kon maluoy ang Diyos kaniya, lugwayan siya sa iyang kinabuhi ngadto sa ika 56 ka tuig.
Ang tanang mga adlaw sa pagsilang ning bi tuona maayong ipamalit sa mga panapton kay halayo kaayo sa mga gapildihan, kasunog, ug kagisi maayong adlaw nga igapangamuyo sa mga punoan; maayong ilangyaw bisan sa mga lagyong dapit ug maayo usab nga ipakighiuli ug kabubut-on sa mga kaaway ug sa gikabingkil; maayong adlaw nga ipangulitawo ug maayong ipamaye kay motabang hangtud ang tagtungod sa pagpalampus sa inalaraw nga kaminyoon, apan dili maayong ikalawat sa kaminyoon kay madaling mag-away ug magbulag ug ang babaye mahimong mananapaw. Ang matawo ning mga adlawa halayo nga maminyo pag-usab. Dautan kon masamad kay kon daku ma daling mamatay kay saw-on sa laing sakit ug mao. usab kining adlawa ang malagmit nga isugod sa gubat.