Related Stories
ALANG SA LALAKE
Ang lalake nga matawo atol sa pagsilang ning bituona madaling makakita ug away kay mao ray hunahuna, maisug apan kulhanon ug kadaghanan sa mga disgrasya nga iyang ikahibalag ning kalibutan, kadaghanan kanila magagikan sa kina-iyahan, hakug ug agawan sa mga butang sa iyang isigkatawo; mahakohakoon ug tigpanunod sa mga kabilin ingon man nga maibugon sa katungdanan ug salapi.
Kon madato mahimong agawan ug yuta, sa hinayhinay molimbong ug utlanan ug hangtud sa udtong tutok ug sa atubangan sa katilingban motikas sa iyang isigkatawo. Dautan nga silingan ug palaaway nga tawo; ug kanunay naglaraw sa kapukan sa iyang mga sagabay sanglit masina-sinahon.
Tungod sa iyang pagkadukirok, hitakbuyan siya sa sakit ingon sa sepiles, gonoriya ug uban pang sakit sa mga babaye nga dautan ug mahimo siyang alaut kay kining sakita magabalikbalik lamang kaniya apan bisan pa, kon makusog ang iyang naturaliza, maabut niya ang kagulangon nga 79. Angay siyang magbantay sa nagkalain-la-ing mananap sa dagat kay maoy nasulat sa basahon sa iyang kapalaran nga maoy iyang kapildihan gawas nga laygayon siya sa nagkalainlaing sakit sa mga babaye; sa katapusan masinugtanon nga bana, apan tampalasan nga amahan.
••LALAKE••
Ang lalake nga matawo dungan sa pagsubang sa Bitoon Capricorn. Daghan mga dautang hiyas kaysa maayo. Apan kon moila lamang siya sa gahum ni Bathala, sa ngadto-ngadto mabuntog niya ang dautan nga batasan ug mahimo siyang tawo nga solundon ug kasinahan sa pagka mahuyo sa panimuot ug pagkamalikayon sa buruka o bingkil sa iyang isigkatawo. Kining bataa magtubo nga garboso. Paligason lang ang iyang kadula unya sumbagon bisan sa diyutay nga hinungdan. Apan kon duna siyay makaon manghatag usab sa iyang kauban, dili dawo.
Mahitungod sa natad sa gugma siya hilabihan kaabubhoan ug kaigihan. Dili buot nga ang babayeng iyang tinguhaon ulitawhan sa lain. Masuko kun tupad-tuparan sa laing ulitawo ang iyang hinigugma. Dili gusto sa harana. Mangulitawo nga mag-inusara ug dili tigtug-an sa iyang mga sekreto sa gugma.
Sagad makahibalag ug lantugi nga musangpot usahay sa away. Iyang higala kadtong mouyun-uyon sa iyang hunahuna. Subra ang iyang kaikag sa kwarta ug bahandi. Kon masapian siya madungog sa nagka-agawan sa yuta ingon man sa ubang kabtangan sa iyang kasikbit o silingan. Alang kaniya may daku siyang katungod sa pagpanunud sa kabilin sa iyang katigulangan o sa katigulangan sa iyang asawa.
Malipay siya kon abuton ug sakit ang tawo nga iya gikalagotan. Tungod sa iyang pagka bisyuso sa babaye, pagabalik-balikan siya sa makalilisang sakit sa babaye. Mag-antus siya sa kahapdos ug ang iyang mga anak, malagmit hitakdan.
Ang pagbalik sa Diyos mao ray makaluwas kaniya sa dili maisip nga katalagman. Ingon man makapausab sa iyang kinaiya. Inig tapat na niya sa iyang mga lakang siya pagadaygon sa katawhan kay ang iyang batasan makapahimuot na man unya sa kasingkasing sa mga tawo.
Angay siyang maglikay sa mga mananap nga himaak o sungayan. Ang dagat upod piligroso kaniya. Moabot siya sa 79 ka tuig ang iyang panuigon basta magbantay lamang siya sa iyang lawas, sa iyang pagpahulay, pagkaon ug paglihok-lihok.
ALANG SA BABAYE
Ang babaye nga matawo atol sa pagsilang ning bituona, maayo kaayo ug gawi ug maayong silingan lahi sa lalake nga matawo ning adlawa madaling tambagan ug tudloan ug masayon usab nga hangyo-on kon dunay kinahanglan,, pangayoon kun paliton.
Malimtanon hino-on ug hangtud ang iyang gikoptan iyang pangita-on matuho-tuhuon sa bisan unsay iyang madungog; ug madali ra nga mahitumpawak sa mga limbong ug lansis sa mga lalake. Takbuyan siya sa mga sakit nga gagmay ug maabut niya ang kagulangón nga 67 ka tuig; sa katapusan, maayong inahan ug mahigugma-on nga asawa.
v2
Ang batang babaye nga mahimugso atol sa pagsubang sa Bitoon Capricorn. Aduna sa nagkalainlaing hiyas sa pagka malumog kasingkasing ug pagka gaan sa hunahuna. Dili daling masuko. Kon imong yangoyangoan basta aduna lamang siya. Siya dili gayud mubalibad. Sayon malukmay ang iyang dughan labina kon makabati sa imong kalisdanan. Apan, dili lagmit nga siya baslan sa iyang kaayo. Mahiubos kon masayran niya nga naningkamot ka sa pag-ilis kutob sa otang nilong kabobot-on kaniya. Humok ug ulo. Sayon tudluan sa mga buhatbuhat.
Ang makadaot kaniya mao nga mag-antos siya sa kalaa sa limbong sa mga lalake. Motuo dayun bisan bakakan. Alang kaniya, matuod ang tanang pulong sa lalake. Sanglit walay buling sa kadautan sa iyang kasingkasing. Siya magtuo nga pulos maayo ang sulti sa mga tawo.
Maayong motipig sa panumpa sa iyang hinigugma kini iya isipon nga mao gayud iyang ikauban sa kinabuhi. Dili na mangitag lain. Apan alaut siya kay ang lalake magbudhi kaniya ug mabiya lang sa walay pahibalo.
Mahimong usa ka inahan nga maanghop,malantawon, matukawon alang sa kaugmaon sa iyang mga anak. Usa ka asawa nga buotan. Mopuyo lang sa panimalay, magabuhat inig abot sa iyang bana. Dili abubhoan. Malimtanon siya. May gagmay nga sakit ang motakboy kaniya. Makab-ut niya ang kagulangon 67 ka tuig.
Kining adlawa maayong ipangulitawo ug iminyo ingon man maayong isugod sa mga dagkung bulohaton; maayong adlaw sa pagdapat sa mga bulong, maayong panahon nga itangdo sa babaye sa pangulitawo sa mga lalake kay halayo sa mga disgrasya; maayo nga higayon nga igakita sa mga dalaga ug ulitawo kun mga hinigugma kay mahilayo ang mga dautang hunahuna ug maayo usab nga adlaw sa pagbuhi ug dakung puhunan sa pa tigayon bisan sa sangga sangga kay halayo sa ka hupay; maayo usab nga ipanghigot sa manok kay dali ra nga magatid ug may suerte sa tari.